Lëkkaloo ak jokkoo bi ci béréb yu wute ndax xarala yu bees yi ñeel waa bitim‐réew: gëstu bi ci wàllu Norwees ak Senegaal.
Gàttalub yaxal bi ci wolof
Translation by Abou Bakry Kébé, Université Gaston Berger de Saint‐Louis
Yaxal bi day jàngat ay xibaar yees jukkee ci ñeenti njaboot yu cosaanoo Senegaal tey dund ca réewum Norwees. Jubluwaayu gëstu bi mooy càmbar naka la njaaboot yooyii di jëfandikoo jumtukaayi xarala yu bees yi ci seen i jokkoo ñeel naal yi ñuy naal ca bitim‐réew. Rax‐ci‐dolli, day saytu njeexital yi wuteg làmmiñ yiy am ci jokkoo yoyule. Gëstu bi nag, tëralees na ko ci xalaatiinu Blommaert, Collins ak Slembrouck (2005), ñoom ñi fént baatub nasaraan bii di «polycentricity» [maanaam, béréb yu fasantikoo te am dayo bu réy ci wàllu jokkoo]. Lees ko dugge mooy jàngat ni jokkoo gi bindoo ci ñeenti béréb yi gën a fès [ñu dippe leen ay «centres», maanaam digg]. Ci béréb bu ci nekk làkk yi fa gën a fès mënees na leen a lëkkale ak yuq wax ji, aji‐wax ji – ak ni way‐tukki yiy xalaatee – seen gisiinu àddina. Dafa di, ni ñuy jëfandikoo làkk yi, wutewul ak ni leen askan wiy jëfandikoowee. Ndax, làmmiñ wu ne, fi sa dayo tollu rekk lañ lay waxe. Nde, làmmiñ yi yemuñu; bu ci nekk day màndargaal waxiin ak déggiini nit ñi koy jëfandikoo. Te, wirgoy man‐man yeek xarala yi day feeñ ci ni ñuy jëfandikoowee làmmiñ yi. Jëfiinu mboolook kuréli way‐tukki yi dafa xarañe lool ci wàlluw làmmiñ ak lépp lu koy màndargaal. Yooyu njàngat dañuy fésal solos jokkoo gi ci xarala yu bees yi am. Ndaxte, dañuy boole ay mbooloo ak i kurél yu soreyoo ba tax ñu mën leen a gëstu ci bépp fànn bu way‐tukki yiy jëfandikoowee làmmiñi askan wi.